بسم الله الرحمن الرحيم و به نستعين
النهادرة جايبلكم مختارات من اجمل ما كتب شاعرنا
المصري الاصيل .... الضاحك الباكي .... صلاح جاهين
==============================
يا عندليب ما تخافش من غنوتك
قول شكوتك و احكي عن بلوتك
الغنوة مش هتموتك انما
كتم الغنا هو اللي هيموتك
=====================
غمض عينيك و امش بخفة و دلع
الدنيا هي الشابة و انت الجدع
تشف رشاقة خطوتك تعبدك
لكن انت لو بصيت لرجليك تقع
===================
اوصيك يا ابني بالقمر و بالزهور
اوصيك بليل القاهرة المسحور
و ان جيت في بالك .... اشتري عقد فل
لاي سمرا ...... و قبري اوعك تزور
=====================
ياللي انت بيتك قش مفروش بريش
تقوي عليه الريح يصبح مفيش
عجبي عليك حواليك مخالب كبار
و مالكش غير منقار و قادر تعيش
======================
ايوب رماه البين بكل العلل
سبع سنين مرضان و عنده شلل
الصبر طيب ..... صبر ايوب شفاه
بس الاكاده مات بفعل الشلل
====================
انا قلبي كان شخشيخة اصبح جرس
جلجلت بيه صحيوا الخدم و الحرس
انا المهرج .... قمتوا ليه خفتوا ليه
لاف ايدي سيف و لا تحت مني فرس
=====================
ايش تطلبي يا نفس فوق كل ده
حظك بيضحك و انتي متنكدة
ردت قالت لي النفس : قول للبشر
ما يبصوليش بعيون حزينة كده
=====================
بحر الحياة مليان بغرقي الحياة
صرخت خش الموج في حلقي ملاه
قارب نجاه ..... صرخت قالوا مفيش
غير بس هو الحب قارب نجاه
=====================
انشد يا قلبي غنوتك للجمال
و ارقص في صدري من اليمين للشمال
ما هوش بعيد تفضل لبكره سعيد
ده كل يوم فيه الف الف احتمال
=====================
